Gisugyot si Interior Secretary Jonvic Remulla nga tugutan ang Philippine National Police (PNP) nga makainspeksyon sa mga balay sa mga indibidwal nga adunay legal nga armas. Tumong niini nga masuta kung husto ba ang pagpahiluna sa mga armas aron dili kini makuha o magamit sa mga dili otorisadong tawo.
Gipadayag ni Remulla ang sugyot human sa duha ka insidente sa pagpamusil sa mga eskwelahan sa Tacloban City ug Zamboanga City, diin mga menor de edad ang nalambigit ug nakakuha sa armas nga legal nga gipanag-iya sa ilang mga sakop sa pamilya.
Matud ni Remulla kinahanglan usbon ang implementing rules and regulations sa Republic Act 10591 aron mahimong legal ang maong inspeksyon.
Giila usab niya nga posibleng adunay mosupak tungod sa privacy ug uban pang katungod, apan iyang gipasiugda nga ang pagpanag-iya og armas usa ka pribilehiyo ug adunay katugbang nga responsibilidad.
Photo Courtesy: Philippine News Agency
