Mokabat na sa 12 ka indibidwal ang namatay tungod sa sakit nga dengue sa Zamboanga del Sur, samtang 2,649 ka kaso ang natala gikan Enero 1 hangtod Agosto 18, 2026, base sa datos sa Integrated Provincial Health Office (IPHO) Zamboanga del Sur.
Matud ni Kurt Bryan Larubis, Provincial Disease Surveillance Officer, mas taas ang dengue cases karong tuiga kumpara sa samang panahon niadtong 2025, diin 2,382 ka kaso ang natala. Apan mas ubos pa karon ang gidaghanon sa namatay, tungod kay 19 ka dengue-related deaths ang natala sa samang panahon niadtong miaging tuig.
Segun ni Larubis, lakip sa mga lungsod nga nakatala og daghang kaso mao ang Tabina, Margosatubig, Lapuyan, Lakewood, Guipos, Dimataling, San Miguel, Dumalinao, Pagadian City ug Vincenzo Sagun.
Gipahinumdoman usab niya ang publiko nga walay gipiling edad ang dengue, dili lamang mga bata ang mahimong maigo niini tungod kay adunay mga namatay nga mga hamtong, lakip ang 44-anyos.
Nanawagan usab ang IPHO sa publiko nga dili magkumpiyansa ug magpakonsulta dayon kung makasinati og hilanat, sakit sa tiyan, pagsuka, pagdugo sa gums o ilong, grabeng kaluya, o uban pang sintomas nga posibleng may kalabotan sa dengue.
