Duha ka mga jobseekers ang na-hired on the the spot sa World Café of Opportunities Jobsfair nga gipasiugdahan sa TESDA Zamboanga del Sur uban sa Department of Labor and Employment (DOLE) 9 sa may Robinsons Mall, Pagadian City, adlawng Miyerkules, Agosto 27, 2026.
Matud ni DOLE 9 Regional Director Albert Gutib, ang maong kalihukan gisalmutan sa walo ka mga local employers ug upat ka mga Overseas recruitment agencies nga nag-abli ug libuang mga job vacancies alang sa tanang mga nanginahanglan ug trabaho.
Segun ni RD Gutib, 59 ka kwalipikadong aplikante ang nakasubmitar sa ilang mga aplikasyon ngadto sa participating employers. Padayon usab matud pa nga imonitor sa DOLE-9 ang mga aplikante aron masiguro nga ilang makompleto ang dugang nga requirements alang sa posisyon nga ilang gi-aplayan.
Samtang, padayon nga nagdasig si RD Gutib sa tanang mga nangita og trabaho nga kanunay mag-andam sa ilang mga dokumento, ilabina ang updated nga resume, ug pahimuslan ang mga job fair ug employment facilitation programs sa DOLE 9.
Pinaagi niini, malaumon si RD Gutib nga mas daghang jobseeker ang matagaan og higayon nga makakita og trabaho ug makasugod og bag-ong oportunidad sa pagpanarbaho sa Zamboanga Peninsula Region.
