Pormal nang gipasaka sa House of Representatives ang P7.2-trilyon nga General Appropriations Bill o GAB alang sa 2027, nga kini na ang pinakadakong gisugyot nga national budget sa kasaysayan sa nasud.
Gipasaka ni House Committee on Appropriations Chairperson ug Nueva Ecija 1st District Representative Mikaela Angela “Mika” Suansing ang House Bill No. 10858 niadtong Miyerkules, Agosto 26. Ang proposed budget gibase sa P7.2-trilyon nga National Expenditure Program o NEP nga gisumite sa Department of Budget and Management o DBM sa Kongreso niadtong Agosto 11.
Pinakadakong bahin sa proposed budget ang alang sa Department of Education nga mokabat sa P976 bilyon, samtang P644 bilyon ang gisugyot alang sa Department of Public Works and Highways. P353.8 bilyon usab ang alang sa health sector, lakip ang Department of Health, specialty hospitals ug PhilHealth. Lakip sa dagkong pondo ang P332.5 bilyon alang sa Department of the Interior and Local Government, P328.8 bilyon para sa Department of National Defense, P302.2 bilyon para sa transport sector, ug P261.7 bilyon alang sa agriculture sector.
Padayon nga susihon sa House Committee on Appropriations ang budget sa matag ahensya sa dili pa dad-on ang GAB sa plenaryo alang sa deliberasyon ug pag-apruba. Tumong sa Kamara nga makompleto ug maaprobahan ang proposed budget sa third ug final reading sulod sa 53-adlaw nga timetable.
Gipasaligan usab ang transparency sa proseso, lakip ang livestreaming sa bicameral conference committee deliberations. Human maaprobahan sa Kamara, moagi pa ang GAB sa Senado, diin ipahiusa ang bersyon sa duha ka kapulungan sa dili pa ipadala kang Presidente Ferdinand Marcos Jr. alang sa paglagda.
Photo courtesy: Rep Mika Suansing/ Facebook
