Misaka na sa labing menos 160 ang namatay samtang gatusan pa ang gikatahong nawala human sa makadaot nga flash flood nga miigo sa utlanan sa Nepal ug Tibet, China. Sa pinakabag-ong datos, 157 ka patay ang narekober sa Nepal, samtang tulo ang kumpirmadong namatay sa Tibet. Padayon ang search and rescue operations ug gilauman nga mahimo pang mosaka ang death toll. Kapin 400 ka tawo ang gi-report nga nawala sa Nepal, lakip ang mga langyaw nga turista ug pilgrims nga atua sa rehiyon sa dihang miigo ang katalagman. Sa Tibet, 265 usab ang gi-report nga nawala sa Gyirong human maigo sa mudslide ang border area.
Lapad ang kadaot sa Rasuwa, Nuwakot ug uban pang lugar sa Nepal human maanod sa kusog nga tubig, lapok ug dagkong bato ang mga balay, dalan, tulay ug hydropower facilities. Base sa unang assessment sa mga disaster authorities sa Nepal ug satellite imagery, posibleng usa ka ice-rock avalanche o pagkahugno sa bahin sa glacier duol sa utlanan sa Nepal-China ang hinungdan sa dakong bugso sa tubig ug debris ngadto sa Lhende River ug Bhotekoshi river system.
Padayon pang gisusi kung adunay kalabotan ang na-record nga seismic activity sa wala pa ang katalagman. Gipakusgan na sa gobyerno sa Nepal ang rescue, search ug relief operations, apan napalisdan ang mga rescuers tungod sa nadaot nga mga dalan ug tulay, pagkawala sa komunikasyon ug taas nga lebel sa tubig. Nagbantay usab ang mga awtoridad batok sa posibleng dugang nga peligro sa mga suba ug dili lig-on nga mga lugar sa Himalayas.
Photo courtesy: AP Photo/Niranjan Shrestha
