Gipaagi sa Bureau of Internal Revenue o BIR ang ilang tax investigators sa ikaduhang lebel sa pagsusi pinaagi sa bag-ong revalidation o “audit of auditors” aron malikayan ang sayop sa pagkalkula ug masiguro ang pagsunod sa balaod sa tanang tax assessments. Gimando ni BIR Commissioner Charlito Martin R. Mendoza ang proseso ubos sa Revenue Memorandum Order No. 22-2026 nga gipetsahan Agosto 24.
Ubos sa bag-ong sistema, susihon pag-usab ang audit findings, computations ug assessment issuances aron masiguro nga tukma, legal ug walay seryosong sayop ang mga desisyon sa tax investigators. Bantayan usab ang pagsunod sa hustong proseso, deadlines, dokumentasyon ug digital records aron adunay kompleto ug masaligan nga audit trail.
Kabahin kini sa paningkamot sa BIR nga mahimong mas patas ug organisado ang tax audits pinaagi sa system-assisted ug risk-based taxpayer selection. Ang mga kaso pilion pinaagi sa anonymized process aron malikayan ang pagpihig, samtang dili awtomatikong i-audit ang mga negosyo nga adunay tax exemptions o incentives. Ang mga opisyal nga molapas sa mga lagda mahimong silotan og administrative sanctions, ug mahimo usab silang atubang og civil o criminal liability kung gikinahanglan.
Photo courtesy: Bureau of Internal Revenue
