Giimbestigahan karon sa Police Regional Office-10 o PRO-10 ang alegasyon nga adunay sakop sa Misamis Oriental Police Provincial Office nga nalambigit sa pagpangayo og “SOP” o protection money sa mga smugglers nga nagpasulod og mga kontrabando sa Misamis Oriental.
Matud ni PRO-10 Spokesperson Police Major Joan Navarro, gikinahanglan una nga beripikahon pag-ayo ang impormasyon aron matino kung adunay basehanan ang alegasyon.
Gipasabot ni Navarro nga kung mapamatud-an ang alegasyon, posible nga pasakaan og criminal ug administrative cases ang police personnel nga nalambigit.
Posible usab nga mahatagan og silot nga mahimong mosangpot sa pagkatangtang sa katungdanan kung mapamatud-an ang paglapas, subay sa hustong imbestigasyon ug legal nga proseso.
Padayon ang imbestigasyon sa kapulisan aron matino ang kamatuoran sa alegasyon ug mapanubag ang bisan kinsa nga mapamatud-ang nalambigit sa ilegal nga kalihokan.
Photo courtesy: Market Mind Local
