Gipahigayon sa Philippine Sports Commission (PSC) ang Indigenous Peoples (IP) Games Mindanao Leg niadtong miaging semana sa San Agustin, Surigao del Sur, diin kapin 300 ka partisipante gikan sa mga tribong Mandaya, Manobo ug Mamanwa ang nagtapok aron ipakita ang ilang tradisyonal nga kahanas sa kultura ug abilidad sa sports.
Gipahigayon ang kalihokan pinaagi sa lig-ong pakigtambayayong sa PSC ubos sa pagpanguna ni Commissioner Matthew “Fritz” Gaston, sa Provincial Government of Surigao del Sur, Municipal Government of San Agustin ubos ni Mayor Nicolas Almeda, ug sa National Commission on Indigenous Peoples (NCIP).
Gibahin ang mga partisipante ngadto sa lima ka cluster nga nagrepresentar sa nagkalain-laing mga lungsod ug siyudad sa probinsya.
Ang Cluster 1 naglangkob sa Lingig ug Bislig City; Cluster 2 sa Hinatuan, Tagbina ug Barobo; Cluster 3 sa Lianga, San Agustin, Marihatag ug Cagwait; Cluster 4 sa Bayabas, San Miguel, Tago, Tandag City ug Cortes; samtang ang Cluster 5 naglangkob sa Carrascal, Cantilan, Madrid, Carmen ug Lanuza.
Lakip sa mga traditional cultural games nga gilambigit sa kompetisyon mao ang Pagpilak (Speartm throwing), Tunod tu Pana (Archery), Kadang-kadang sa Kawayan, Hinang tu Pisi, Binogkutay (Tug of War), Binadju, Yajug, Eskrima, ug Volleyball – Holding (Rattan).
Tumong sa IP Games nga mapalambo ang talento sa mga lumadnong komunidad pinaagi sa sports, samtang mapreserbar ug mapalambo usab ang ilang tradisyonal nga kultura ug mga dula.
Photo courtesy: Provincial IPMR – Surigao del Sur
