Nagpaabot og hugot nga pahimangno ang Police Regional Office 13 (PRO-13) batok sa nagkadaghan nga AI-generated photos sa mga indibidwal nga nagsul-ob og uniporme sa kapulisan nga mikaylap online.
Sumala kang Police Major Jennifer S. Ometer, Chief sa Regional Public Information Office sa PRO-13, adunay kabalaka ang kapulisan nga mahimong gamiton sa mga cybercriminal ang maong mga litrato alang sa identity theft, online impersonation ug uban pang matang sa cyber fraud. Posible usab nga gamiton ang mga maong account sa pagpangilad, pagpangayo og kwarta, pagpanghulga sa mga biktima pinaagi sa pagpakaaron-ingnon nga pulis.
Gipahinumdoman sa Philippine National Police (PNP) ang publiko nga kung mogamit man og AI alang sa kalingawan, kinahanglan nga butangan kini og tin-aw ug klarong label sama sa “AI-Generated Image” o “Fictional Artwork.” Tumong niini nga malikayan ang pagtuo sa publiko nga ang maong litrato nagrepresentar sa tinuod ug lehitimong miyembro sa kapulisan.
Nanghinaut ang PNP sa kooperasyon sa publiko pinaagi sa pag-report sa mga kadudahang social media accounts nga naggamit og digital o peke nga police profiles, aron makatabang sa pagpugong sa pagkaylap sa cyber fraud sa rehiyon ug sa tibuok nasud.
