Nasumpo sa Federal Bureau of Investigation o FBI, ang usa ka botnet nga gituohang gigamit sa Chinese group nga QTFY sa pagtarget sa mga kritikal nga imprastraktura sa Estados Unidos.
Gipahibalo kini ni Brett Leatherman, Assistant Director sa FBI Cyber Division. Base sa ilang imbestigasyon, nalambigit ang QTFY sa Nanjing Xinjiuwei Network Technology Company, usa ka kompanya nga giingong namaligya og gikawat nga datos ug mga serbisyo sa pag-hack ngadto sa mga ahensya sa militar ug pang-espiya sa China.
Lakip sa mga giingong nabiktima sa computer intrusion sa QTFY ang NASA, Federal Reserve, Department of Energy, Department of Justice, Department of Health and Human Services, National Institutes of Health ug US Senate. Una nang gipahibalo sa US Department of Justice ang pagpugong sa duha pa ka hacking platform nga giingong gi-operate gikan sa China, ang QScan ug QTRouter.
Samtang, gipasalig ni US Attorney General Todd Blanche, nga na-disable na sa mga otoridad ang malisyosong software nga nalambigit sa maong operasyon ug nagpadayon ang imbestigasyon. Gipasabot sa US, nga kabahin kini sa ilang mga paningkamot sa pagpanalipod sa mga kritikal nga sistema ug imprastraktura batok sa mga hulga sa cyberspace.
Photo Courtesy: Siliconangle
