Labaw pa sa pagkaon ug gitawag nga “King of Fruits,” mao kini ang gibida ni Antonio Atowan ang Presidente sa Tagum City Durian Growers Association (TACDUGA), nga sumala pa niini ang durian usa usab ka simbolo sa kakugi, paglahutay ug panginabuhian sa daghang mag-uuma ug ilang mga pamilya ning dakbayan sa Tagum.
Gihatagan sumala pa og kahayag ang kasaysayan sa durian sa Tagum, gikan sa pagsugod niini sa dakbayan hangtod sa padayon nga paglambo sa industriya sa naglabay nga mga tuig.
Matud sa maong lider, dako ang natampo sa durian sa pagmugna og panginabuhian ug mga oportunidad alang sa lokal nga mga mag-uuma ug ilang mga pamilya.
Gikan sa pag-atiman sa mga kahoy, pag-ani, pagbaligya hangtod sa pag-abot niini sa lamesa sa mga konsumidor, ang matag bunga sa durian nagdala sa istorya sa pagpaningkamot sa mga nagpaluyo niini.
Samtang sa pikas bahin gisaulog ang Durian Festival 2026 karong bulana, nga gilauman’g mas mailhan ug mapasidunggan ang lawom nga kasaysayan sa durian sa Tagum ug ang mga mag-uuma nga adunay dakong papel sa padayon nga pagtubo sa lokal nga sektor sa agrikultura.
Giawhag karon sa LGU Tagum ang publiko nga makiglambigit sa Durian Festival 2026 nga ipahigayon karong Agosto 28 hangtod 30, 2026, isip pagsaulog sa usa sa labing bililhon nga produkto ug garbo ning dakbayan.
Video Courtesy: Foodie
