Misaka og 2.6 porsyento ang produksyon sa palay sa Northern Mindanao niadtong 2025, nga miabot sa 835,446 metric tons gikan sa 814,081 metric tons niadtong 2024, sumala sa Philippine Statistics Authority Region X.
Ang Bukidnon nagpabiling pinakadakong kontribyutor sa palay production sa rehiyon nga adunay 520,907 metric tons. Samtang, mikunhod og 0.6 porsyento ang produksyon sa mais, gikan sa 1,536,376 metric tons niadtong 2024 ngadto sa 1,527,567 metric tons niadtong 2025.
Sa major crops, miabot sa 11,049,779.5 metric tons ang kinatibuk-ang produksyon sa Northern Mindanao niadtong 2025, kon 17% nga pagtubo kumpara sa 9,444,284.5 metric tons niadtong 2024. Sa livestock, mikunhod og 1.5 porsyento ang produksyon ngadto sa 269,807 metric tons, diin hog o swine ang nag-unang kontribyutor nga adunay 213,987 metric tons o 79.3 porsyento. Sa laing bahin, misaka og 4.2 porsyento ang poultry production ngadto sa 275,691 metric tons, diin nanguna ang chicken nga adunay 192,451 metric tons.
Padayon usab ang pagtubo sa fisheries sector sa rehiyon, diin ang kinatibuk-ang produksyon miabot sa 74,459 metric tons niadtong 2025, o 12.5 porsyento nga mas taas kumpara sa 66,211 metric tons niadtong 2024. Misaka og 5.7 porsyento ang commercial fisheries ngadto sa 15,723 metric tons, samtang ang marine municipal fisheries mitubo og 17.4 porsyento ngadto sa 42,198 metric tons.
Apan panghinaot ni PSA Regional Director, Dr Janith Aves na dili lamang kita magfocus sa pag-ubos taas sa mga numero ug kini nga mga datus magpabiling anaa lang sa papel apan kini nga mga numero labing mahinungdanong kapanukaran sa paghimo og programa aron nga makapalambo sa sektor sa agrikultura ug masiguro nga adunay malungtarong kakuhaan sa pagkaon ang tibuok rehiyon.
Photo courtesy: PSA Region X Northern Mindanao
