Miubos sa record-low nga 9.7 porsiyento ang poverty rate sa Pilipinas niadtong 2025, subay sa pinakabag-ong taho gikan sa Philippine Statistics Authority. Katumbas kini sa gibana-bana nga 6.5 ka milyong lungsanon nga nakabangon gikan sa kalisod taliwala sa mga tuig 2023 ug 2025.
Sumala sa Department of Economy, Planning, and Development, nakab-ot sa nasod nga mas sayo kaysa gilauman ang single-digit target ubos sa Philippine Development Plan.
Gipasiugda sa pamunoan sa ahensya nga dako og tabang sa katuyuan ang mga targeted assistance ug mga inisyatibo nga nagtumong sa pagpausos sa gintang sa kita sa mga lungsanon. Natala usab sa ahensya sa estadistika ang pagsaka sa hapit 22 porsiyento sa nominal income sa nagkalainlaing lebel sa kita gikan 2023 hangtod 2025, samtang nagpabilin lamang sa lima ka porsiyento ang cumulative inflation sa parehas nga mga tuig.
Sa laing bahin, gipunting sa World Bank ang kaimportante sa pagpadayon sa maayong dagan sa ekonomiya pinaagi sa paghimo og de-kalidad nga trabaho, inclusive growth, ug mas gipanalipdan nga social protection. Apil sa mga nag-unang sugyot niini ang pagpalig-on sa mga programa sama sa 4Ps aron padayong mapanalipdan ang mga huyang nga sektor ug pamilya.
Photo courtesy: Foreign Policy
