Niigo ang usa ka magnitude 5.9 nga linog sa sidlakang bahin sa Japan, kadlawon sa Domingo, nga naghinungdan sa kadugay sa biyahe sa sakyanan ug naghatag og kadaot sa Tokyo area. Nahitabo ang linog mga alas 2 sa kadlawon, diin ang epicenter nahimutang sa habagatang bahin sa Ibaraki Prefecture sa kalawmon nga 68 kilometro. Sumala sa Japan Meteorological Agency (JMA), walay giisyu nga warning sa tsunami.
Nakaabot sa lower 5 ang intensity sa linog sa Japanese seismic intensity scale nga kutob sa 7 sa pipila ka bahin sa Ibaraki ug sentrong Tokyo, ug nabati usab kini sa dakong bahin sa amihanan-sidlakan ug sentrong Japan. Tungod sa pagtay-og, naatras ang pagsugod sa pipila ka serbisyo sa tren ug aduna usab pipila ka tawo nga naangol, lakip na ang usa ka batan-ong lalaki ug usa ka tiguwang nga babaye nga nag-edad og 70 sa Saitama, ingon man tulo ka tawo sa Kawasaki. Sa Koto Ward sa Tokyo, nabugto ang usa ka linya sa tubig ug padayon pang gisusi sa mga awtoridad kon aduna ba kini kalabotan sa linog.
Samtang, walay nakit-ang abnormalidad sa Tokai No. 2 nuclear power plant sa Ibaraki ug sa Fukushima Daiichi ug Fukushima Daini nuclear plants. Gideklara ni Prime Minister Sanae Takaichi nga gimanduan na niya ang mga opisyal nga susihon ang posibleng mga kadaut ug hatagan dayon og pormal nga impormasyon ang publiko. Nagpagawas usab ang JMA og pasidaan nga magmatngon sa posibilidad sa mga aftershocks nga mahimong moabot sa lower 5 intensity sulod sa usa ka semana, ilabi na sa mosunod nga duha hangtod tulo ka adlaw.
Photo courtesy: Taipie Times
