Kung abi nato nga ang mga T-Rex kay pang-museum, salida ug Jurassic Park ra, sayop diay ta!. Sa Japan, nahimong trending ang usa ka talagsaon ug makalingaw nga kompetisyon—T-Rex costume racing, diin ang mga tawo mosul-ob og inflatable dinosaur costume ug mag-ilog sa kadasig sa pagdagan!
Nagsugod kini sa Daisen, Japan niadtong 2022 ug tungod sa kakataw-anan sa mga video nga mikaylap sa social media, misikat kini sa nagkalain-laing bahin sa nasud.
Sa miaging mga tuig, kapin 40 na ka T-Rex races ang gipahigayon sa Japan. Adunay kategoriya para sa mga bata, adult female ug adult male—busa klaro gyud nga dili lang ni basta-basta nga daganan. Naay championship sa mga dinosaur!
Ang pinakalingaw, bisan ang mga contestants dili na makit-an ang ilang mga tiil tungod sa costume, kinahanglan gihapon silang modagan kutob sa ilang mahimo.
Matod sa founder sa maong event, kung tanan man gani sila T-Rex, walay angay ikaulaw!. Ug sa pinakabag-ong dagkong race sa Daisen, kapin 200 ka dinosaurs ang nagtapok sa starting line.
Imagine lang: walay traffic enforcer nga mangutana og lisensya, walay checkpoint… pero tanan naka-T-Rex!. Mao ni siguro ang pinakakuyaw nga pangutana sa Japan karon: “Kinsa ang modaog—ang pinakapaspas nga T-Rex, o ang unang mahutdan og hangin sa costume?”
Photo courtesy: The Atlantic
