Gipasabot sa National Grid Corporation of the Philippines o NGCP nga ang Yellow Alert dili pa nagpasabot og kakulang sa suplay sa kuryente, apan timailhan kini nga nipis na ang operating margin o reserbang kuryente sa sistema.
Sa eksklusibong pakighinabi sa Juander Radyo Malaybalay kang Mae Lopez-Curiano, focal person sa NGCP, iyang gipatin-aw nga ubos sa Yellow Alert, igo pa ang suplay sa kuryente aron matubag ang panginahanglan sa mga konsumante, apan gamay na lamang ang reserba kung adunay kalit nga system disturbance, problema sa transmission system, o pagkapalya sa usa ka dako nga generating unit.
Matud ni Lopez-Curiano, normal ang kahimtang sa Mindanao Grid ug adunay operating margin nga makatubag sa wala damhang pagbag-o sa sistema; apan kung ipagawas ang Yellow Alert, usa kini ka pahimangno nga kinahanglan pakunhuran ang demand sa kuryente aron dili na samot mukagamay ang power reserve.
Gidasig usab ang mga konsumante sa pagpraktis og energy conservation, ilabina sa mga oras nga taas ang demand, pinaagi sa pagpalong sa appliances nga dili kinahanglan gamiton ug paglikay sa sobra nga paggamit sa elektrisidad.
Samtang, lahi ang Red Alert, diin dili na igo ang available nga power supply ug reserve aron matubag ang panginahanglan. Sa maong kahimtang, mahimong ipatuman ang Manual Load Dropping o MLD, rotational brownout, o power outage aron mapadayon ang balanse sa supply ug demand sa sistema.
Photo Courtesy:NGCP File Photo
