Nasakmit sa Malaybalay City Fire Station ang pasidungog isip BFP Region 10 Best City Fire Station ug napwesto usab sa ika-upat nga dapit sa tibuok Pilipinas gikan sa labaw sa 149 ka mga siyudad.
Sumala sa pakighinabi kang FO3 Brent Clyde N. Suico, Media Relations Officer sa BFP Malaybalay ang maong kalampusan nakuha pinaagi sa paglapas sa mga gihan-ay nga criteria, inabagan sa dako nga suporta sa LGU Malaybalay sa pagpanguna ni City Mayor Warren Pabillaran, ug pakigtinabangay sa mga negosyante, lakip sa mga programa sa nilabay ug karon nga mga City Fire Marshal
Hisayrang gawas sa pagpatuman sa kaluwasan sa sunog, gihimo usab sa buhatan ang ilang mga best practices sama sa medical outreach, “Adopt-a-School,” “Pulaguy Kuy Duma Bombero,” ug tree planting aron mas makaserbisyo sa komunidad nga lakip sa nahimong sumbanan sa maong pasidungog.
Gipahinungod sa Malaybalay City Fire Station ang maong kadaugan ngadto sa tanang opisyal, bombero, partner agencies, ug sa tibuok katawhan sa Malaybalay.
Gitataw sa opisyal nga ang maong dungog dili lang usa ka tropeyo, apan usa ka dakong responsibilidad ug pagpakita sa tiunay nga pagsalig sa komunidad sa ilang han-ay. Tungod sa maong garbo, mas misamot ang ilang kaikag nga mohatag og mas paspas ug abante nga pagresponde sa matag sunog ug krisis.
Photo Courtesy: Malaybalay City Fire Station
