Madinalag-on nga nakakuha sang 10 ka medalya ang pulo ka Judokas nga nagrepresentar sa Tacurong City sa 3rd Mindanao Invitational Judo Championship nga ginpatigayon sa Davao City kun sa diin nakuha ang lima ka gold, apat ka silver kag isa ka bronze medal sa duha ka adlaw nga kompetisyon sang Agosto 8 kag 9 sa Mintal Gymnasium sa Mintal, Davao City.
Nagpakigbato ang mga atleta kontra sa mga judokas halin sa nagkalain-lain nga bahin sang Mindanao.
Ang paghanas sa nasambit nga mga atleta pinaagi sa bulig sang Family Jae’ger Mix Judo Club kag South Central Mindanao Judo Association Region 12, sa koordinasyon sang City Youth Development Office–Sports Section sang City Government of Tacurong.
Ginpahayag nga nangin oportunidad ang kompetisyon para sa mga bata nga atleta nga mapakita ang ila abilidad kag madugangan ang ila eksperyensya sa kompetisyon.
Ang amo nga kadalag-an nagadugang sang dungog sa Tacurong City, sa grassroots sports kag nagapakita sang nagatubo nga talento sang mga kabataan sa bahin sang Judo.
Nangin mapinasalamaton naman ang City Youth Development Office–Sports Section sa mga humalampang kag coach sa ila maayo nga performance kag sa pagrepresentar sang Tacurong City sa rehiyonal nga kompetisyon.
Photo Courtesy: City of Tacurong-Youth Sports Development Program
