Miigo ang kusog nga 7.2 magnitude nga linog sentrong bahin sa rehiyon sa Ayacucho, southern Peru, dili pa lang dogay. Daghang mga balay ug pampublikong pasilidad ang nadaot human sa pagtay-og.
Base sa datos sa Geophysical Institute of Peru o IGP, ang epicenter sa linog nahimutang 35 kilometros sa amihanan sa Coracora, Parinacochas Province, ug may giladmon nga 108 kilometros.
Adunay inisyal nga tulo ka nasamdan gikatahong nakasinati lamang og minor injuries samtang nag-evacuate tungod sa kusog nga pag-uyog sa yuta. Wala pay kumpirmadong namatay may kalabotan sa maong linog.
Narekord usab ang kadaot sa mga balay, eskwelahan ug health centers sa pipila ka lugar sa Ayacucho ug kasikbit nga mga rehiyon. Sa unang assessment, 11 ka eskwelahan ug 12 ka health centers ang naapektuhan.
Dugang pa, kapin 9,000 ka tawo ang naapektuhan sa pagkawala sa kuryente sa pipila ka lugar sa Ica ug Ayacucho. Nagpadayon ang assessment sa mga otoridad aron mahibal-an ang tibuok kadaot ug mga residenteng naapektuhan sa linog.
Photo Courtesy: Global News
