Nagtanum sang 150 ka puno sang Narra ang Department of Environment and Natural Resources Region 12 ukon DENR-12, pinaagi sa CENRO Tacurong, kaupod ang Sultan Kudarat Electric Cooperative ukon SUKELCO sa Barangay Titulok, Bagumbayan, Sultan Kudarat.
Ginpatigayon ang tree-planting activity sang Huwebes, Agosto 20, bilang kabahin sang selebrasyon sang 17th National Electrification Awareness Month ukon NEAM.
Nagpakigbahin man sa aktibidad ang mga opisyal kag residente sang Barangay Titulok, lakip ang mga miyembro sang Titulok Community-Based Farmers Association.
Suno sa CENRO Tacurong, ang pagtanum sang mga Narra may tinutuyo nga makabulig sa rehabilitasyon sang mga degraded nga lugar, pag-amlig sang biodiversity, kag pagpalapnag sang kaalam parte sa responsable nga pagdumala sang natural resources.
Ginpahayag man sang ahensya nga ang aktibidad nagapakita sang importansya sang pagbinuligay sang nagkalain-lain nga sektor sa pagpreserbar sang kabukiran kag pagpatuman sang mga programa para sa malig-on kag malungtaron nga ekosistema.
Pinaagi sa sini nga inisyatibo, ginapabaskog sang DENR-12 kag SUKELCO ang ila pag-unong sa environmental protection kag community participation sa Sultan Kudarat.
