Miusos ngadto sa makasaysayanong 6.4% o 1.9 milyong pamilya ang poverty incidence sa Pilipinas niaging 2025, sumala sa Philippine Statistics Authority (PSA).
Kini ang pinakaunang higayon nga miabot sa single-digit level ang lebel sa kabos nga pamilya gikan sa 2.99 milyon niadtong 2023, samtang mikunhod usab sa 9.7% (11.08 milyong indibidwal) ang poverty rate sa katibuk-an.
Gitumbok sa PSA nga ang nag-unang hinungdan sa maong pag-ubos mao ang mas paspas nga pagtaas sa kita sa mga pamilya kumpara sa presyo sa batakang panaliton ug pagkaon. Ubos sa bag-ong sukdanan, ang pamilyang may lima ka miyembro nga nagkita og labaw sa poverty threshold nga ₱14,634 kada bulan giisip nga opisyal nang nakagawas sa kalisod.
Tungod sa maong maayong resulta, nagpabilin ang kompyansa sa gobyerno nga mapadayon ang maong lebel sa kalamboan. Tumong karon sa kagamhanan nga mapanalipdan ang single-digit poverty incidence hangtod sa pagtapos sa termino ni Presidenti Ferdinand Marcos Jr. sa 2028.
Photo Courtesy:Medium
