Gikabalak-an sa mga magtutudlo, estudyante ug kawani sa Davao Oriental State University (DORSU) ang laing insidente sa pagpanghulga nga mikaylap sa social media, diin gihisgotan ang giingong planong pagpatay sa usa ka magtutudlo ug security guard sa maong unibersidad.
Ang maong post nakahatag og kahadlok ug kabalaka sa komunidad sa eskwelahan, ilabina tungod sa kasamtangang panginahanglan nga mapalig-on ang seguridad sulod ug palibot sa mga tulunghaan.
Kahinumdoman nga bag-o pa lamang nahitabo ang pagpamusil sa Ateneo de Zamboanga University nga mikalas sa kinabuhi sa duha ka tawo ug pagkaangol sa siyam pa.
Kalabot niini, nagpagawas og opisyal nga pahayag si Dr. Roy Ponce, Presidente sa DORSU, diin gihangyo niya ang mga estudyante nga dili sabayan o palapdan ang mga pagpanghulga nga makita sa social media aron malikayan ang dugang nga kahadlok ug kagubot sa komunidad.
Samtang, padayon na ang mga otoridad sa pag-ila ug pagsubay sa identidad sa tawo nga nalambigit sa maong post aron masuta ang tinuod nga kahimtang ug mapatuman ang angay nga aksyon subay sa balaod.
Photo Courtesy: DORSU
