Gipang-sita ug gipapasara sa Bureau of Internal Revenue o BIR ang dispensing pumps sa 25 sa 65 ka gasolinahan sa Luzon human mapakyas sa fuel marking testing sulod sa unang tulo ka adlaw sa ilang operasyon. Tumong sa maong lakang nga masuta ang posibleng paglikay sa pagbayad sa hustong buhis ug mapanalipdan ang mga matinud-anong negosyo batok sa dili patas nga kompetisyon sa industriya sa petrolyo.
Sumala kang BIR Commissioner Charlito Martin Mendoza, nagsugod ang operasyon niadtong Agosto 17, 2026, sa pakigtambayayong sa Bureau of Customs o BOC ug sa awtorisadong service provider nga nagpahigayon sa pagsusi sa mga sample sa gasolina, krudo ug gaas. Ang mga apektadong produkto gi-inventory ug giselyohan samtang gihulat ang pinal nga resulta sa confirmatory testing, subay sa mga kasamtangang lagda.
Kung mapamatud-an nga nakalapas sa balaod, ang mga establisementong nakasala mahimong ipataw-an og tukmang buhis, multa ug uban pang legal nga aksyon. Gipahayag usab sa BIR nga dili kutob sa usa ka higayon ang maong operasyon ug plano nilang palapdan pa ang kampanya ngadto sa ubang mga rehiyon sa tibuok nasod.
Photo Courtesy: BIR
