Mokabat na sa ₱60 milyon nga cash assistance ang na apud-apod na sa mga kwalipikadong benepisyaryo sa Agusan del Sur ubos sa Unified Package for Livelihoods, Industry, Food, and Transport o UPLIFT Program sa gobyerno.
Base sa datos hangtod Agosto 14, 2026, mikabat sa 30,417 gikan sa 42,505 ka mga natala nga benepisyaryo ang nakadawat na sa ilang ₱2,000 nga cash assistance, nga katumbas sa 71.56 porsyento nga payout rate. Malampuson usab nga nakapahigayon og payout ang tanang 13 ka lungsod ug usa ka component city sa probinsya sa Agusan del Sur.
Ang mga benepisyaryo giila pinaagi sa Community-Based Monitoring System (CBMS) sa Philippine Statistics Authority (PSA), diin giklasipikar ang poor ug near-poor nga panimalay nga nanginahanglan og interbensyon gikan sa gobyerno.
Matag kwalipikadong panimalay makadawat og ₱2,000 nga subsidy kada bulan gikan Hulyo hangtod Disyembre 2026. Samtang ang mga miyembro sa Pantawid Pamilyang Pilipino Program (4Ps) mahimong makabenepisyo sa maong ayuda sa usa lamang ka higayon.
Sumala kang Social Welfare Officer II Cristian Silverio, gipahapsay ang proseso sa paghatag sa ayuda aron maseguro nga ang mga tinuod ug kwalipikadong benepisyaryo lamang ang makadawat niini. Matud niya, usa sa protocol sa wala pa ma-claim ang cash aid mao ang pag-validate sa identidad ug uban pang dokumentong gikinahanglan sa benepisyaryo aron maseguro nga ang ayuda mahatag lamang sa mga naa sa opisyal nga listahan.
Tumong usab sa programa nga mahatagan og tukmang tabang ang mga pamilya nga labing nanginahanglan, ilabina niining panahona nga nag-atubang ang mga panimalay sa nagkalain-laing kalisdanan sa panginabuhi.
Photo courtesy: Local Government Unit sa San Francisco, Agusan del Sur
