Narekober sa hiniusang operasyon sa kapulisan ug kasundalohan ang usa ka gitagong cache sa mga armas, bala ug improvised explosive devices (IEDs) sa Barangay Tagbobonga, Hinatuan, Surigao del Sur kagahapong adlawa, Agosto 21, 2026.
Ang operasyon gipahigayon sa mga personnel sa 1301st Maneuver Company sa Regional Mobile Force Battalion 13 (RMFB 13), kauban ang mga PNP Special Action Force (PNP-SAF), Regional Intelligence Unit 13 (RIU 13), ug Alpha Company sa 67th Infantry Battalion (67IB) sa Philippine Army. Kauban usab sa operasyon ang mga personnel sa 14th Special Action Company (14SAC), 1st Special Action Battalion (1SAB), 133rd Special Action Company (133SAC), Field Support Battalion (FSB) ug 81st Special Action Company (81SAC).
Ang maong operasyon kabahin sa Joint Major Combat Internal Security Operation ubos sa OPLAN 21-2026 “MUSTANG 08.” Nagsugod ang operasyon human boluntaryong naghatag og impormasyon ang usa ka kanhi rebelde kabahin sa nahimutangan sa gitagong armas. Base sa impormasyon, gilunsad dayon sa mga security forces ang usa ka focused scouring operation sa giilang lugar.
Human sa pagsusi sa maong lugar, nakit-an ug narekober ang usa ka AK-47 nga 7.62mm caliber rifle nga adunay gitangtang o nadaot nga serial number. Narekober usab ang tulo ka AK-47 magazines ug 102 ka bala nga 7.62mm ammunition. Dugang sa mga armas ug bala, nakit-an usab sa operasyon ang upat ka APERS Improvised Explosive Devices o IEDs nga Clamor type, ingon man mga medical supplies ug surgical equipment.
Human sa pagkarekober, gisiguro sa mga otoridad ang mga armas, bala ug uban pang materyales ug gibutang kini ubos sa hustong kustodiya alang sa dokumentasyon ug tukmang disposisyon. Samtang ang mga IED gitugyan ngadto sa mga Explosive Ordnance Disposal (EOD)/K9 personnel alang sa tukmang pagsusi ug luwas nga pagdumala.
Photo courtesy: 1301st Maneuver Company Rmfb13
