Mokabat sa P588.84 milyon nga claims ang gibayran sa Philippine Health Insurance Corporation (PhilHealth-13) ngadto sa mga health facility sa tibuok Caraga Region niadtong bulan sa Hulyo. Sumala sa PhilHealth-13, ang maong kantidad naglangkob sa 45,474 ka processed claims gikan sa nagkalain-laing mga hospital ug clinic sa rehiyon sulod sa maong bulan. Gipadayag sa ahensya nga ang pagproseso sa mga claims nahimo sulod sa average nga 6.28 ka adlaw, nga mas paspas kumpara sa national average nga 10.19 ka adlaw.
Matud sa PhilHealth-13, ang maayong resulta sa turnaround time (TAT) nagpakita sa ilang paningkamot nga makahatag og responsive ug tukma sa panahon nga serbisyo ngadto sa mga health care provider ug miyembro. Padayon usab ang PhilHealth-13 sa pagpalig-on sa suporta ngadto sa mga health facility aron masiguro ang hapsay nga paghatag sa universal health care sa tibuok rehiyon.
Niadtong Hunyo, nakapagawas usab ang PhilHealth-13 og P526.84 milyon alang sa 42,433 ka claims, nga nagpakita sa padayong pagpadagan sa pagbayad sa mga claims ngadto sa mga health facility sa rehiyon.
Photo courtesy: PhilHealth-13
