Gipatuman ang writ of demolition sa usa ka 16 ka ektaryang yuta sa Purok 2B, Barangay Aglayan, Malaybalay City kagahapon, Agosto 20, 2026. Ang maong proseso gipangulohan sa Regional Sheriff ubos sa Department of Agrarian Reform (DAR) alang sa pagtangtang sa mga estruktura ug balay nga nag-okupar sa lugar.
Nagpasalamat ang mga apektadong benepisyaryo ug ang ilang lider nga si Emelia Capacio sa maong lakang, nga ilang giila nga pag-abot sa hustisya human sa halos 36 ka tuig nga paghulat.
Subay sa proseso, misang-at ang walo ka mga farmer beneficiaries og kaso alang sa peaceful possession aron malikayan ang kagubot ug masiguro ang hapsay nga pagbutang sa mga lehitimong benepisyaryo sa luna nga dugay nang na-award kanila sa DAR.
Aron masiguro ang seguridad ug kalinaw atol sa operasyon, 50 ka mga pulis ang gipakatap sa lugar ubos sa pagdumala ni Malaybalay City Police Station Chief Police Colonel Jovit Paglilawan.
Gihimo ang pagtangtang sa mga estruktura aron mabalik ug mahapsay ang pagpwesto sa mga mag-uuma sa ilang gipaabot nga yuta
Hinuon nagmalinawon sa kinatuibuk-an ang operasyon human misanong ang anak sa kanhi tag-iya sa luna nga pamilyang Mamawag ang mando sa pagbiya na sa lugar.
