Andam na sa iyang pagbalik sa kompetisyon ang Filipino MMA fighter nga si Stephen “The Sniper” Loman, human sa pipila ka tuig nga wala makasulod sa ring. Makig-atbang si Loman kang Lasha Abramishvili sa Septiyembre 5, 2026 sa iconic Pula Arena sa Croatia, diin mahimong bahin kini sa co-main event sa BRAVE CF 108.
Matud ni Loman, excited siya nga makig-away sa Croatia ilabina tungod sa kasaysayan sa Pula Arena, usa ka karaang amphitheater diin kaniadto gihimo ang mga gladiatorial contests.
Gipasigarbo usab sa 31-anyos nga fighter ang iyang Ifugao ug Cordilleran nga kagikan, nga iyang dad-on sa maong kompetisyon. Sa iyang professional record, adunay 17 ka daog ug tulo ka kapildihan si Loman. Ang iyang kataposang away nahitabo niadtong 2023 batok kang John Lineker sa ONE Championship, diin napildi siya pinaagi sa unanimous decision.
Samtang, ang iyang kontra nga si Abramishvili adunay 12 wins, 2 losses, & 1 draw, records. Tumong karon ni Loman nga makabalik sa winning form ug ipakita ang iyang gitawag nga “warrior spirit” sa usa ka Cordilleran, samtang iyang girepresentar ang Pilipinas, iyang katawhan ug kultura sa international MMA stage.
Photo Courtesy: ONE Championship
