Nanawagan ang Police Regional Office (PRO)9 sa publiko nga dili magpakatag o mag-share og sayop ug dili beripikadong impormasyon may kalabotan sa shooting incident sa usa ka eskwelahan sa Barangay Tumaga, Zamboanga City.
Matud ni PMAJ Shielamie Chang, Regional Public Information Officer sa PRO-9, giklaro niini nga walay guwardiya nga namatay sa insidente, duha lamang ka estudyante ang nakabsan sa kinabuhi, apil na ang suspect niini, samtang usa pa ang naigo sa bala nga anaa na sa luwas nga kahimtang.
Dugang pa ni Major Chang, importante nga mahimong responsable ang tanan sa paggamit sa social media, ilabina sa pag-post sa mga hulagway sa menor de edad nga nalambigit sa insidente.
Gipahinumdoman sa kapulisan ang publiko nga ang pagpakaylap sa dili pa kumpirmadong impormasyon mahimong makahatag og kalibog ug kabalaka sa komunidad.
Nanawagan ang opisyal sa PRO-9 nga mosalig lamang sa opisyal ug beripikadong impormasyon, ug likayan ang pag-post o pagpakalat sa mga hulagway ug personal nga impormasyon nga mahimong makalapas sa katungod ug privacy sa mga menor de edad.
