Mokabat sa P106.93 milyon nga pondo ang gigahin alang sa pagtukod sa bag-ong 3.65-kilometros nga Farm-to-Market Road (FMR) sa Marihatag, Surigao del Sur, nga gilauman nga makabenepisyo sa 2,293 ka residente, diin kadaghanan niini mga mag-uuma.
Gipirmahan sa Department of Agriculture-Caraga (DA-13) ug sa lokal nga kagamhanan sa Marihatag ang Implementation Management Agreement (IMA) niadtong Miyerkules sa Butuan City, nga nagtimaan sa pagsugod sa procurement process alang sa maong proyekto. Ang proyekto ipatuman ubos sa Philippine Rural Development Project (PRDP), usa sa mga flagship program sa Department of Agriculture nga nagtumong sa pagpalambo ug pagmodernisar sa imprastraktura sa mga rural nga lugar.
Sumala sa DA-13, gilatid sa IMA ang mga katungdanan ug responsibilidad sa DA-PRDP ug sa Municipal Government of Marihatag samtang gisugdan na ang proseso sa pagkuha sa contractor alang sa proyekto. Ang maong farm-to-market road magdugtong sa Barangay Bayan ug Barangay San Isidro, nga gilauman nga makapalambo sa access sa mga mag-uuma ug residente ngadto sa ubang lugar.
Gihulagway usab sa Marihatag LGU ang proyekto isip usa ka importante nga pamuhunan sa rural infrastructure nga makatabang sa pagpausbaw sa accessibility ug lokal nga kalamboan. Sa higayon nga mahuman, ang konkretong farm-to-market road gilauman nga maghatag og mas kasaligan nga transportasyon alang sa pagdala sa mga produkto sa uma, makapamenos sa oras sa pagbiyahe ug makahatag og dugang oportunidad alang sa industriya ug patigayon.
Matud sa DA-13, human sa pagpirma sa IMA, lakip sa sunod nga mga lakang ang pag-isyu sa Certificate of Fund Availability, pagpagawas sa No Objection Letter No. 2, ug ang pag-award sa kontrata sa proyekto.
Photo courtesy: DA-13
