Gikonsiderar sa Department of the Interior and Local Government (DILG) ang pagbutang og mga istasyon alang sa barangay tanod sulod sa mga eskwelahan isip dugang nga seguridad alang sa mga estudyante.
Sumala ni DILG Secretary Jonvic Remulla, pamilyar ang mga barangay tanod sa ilang tagsa-tagsa ka komunidad, lakip na ang mga kabatan-onan nga nag-eskwela niini. Tungod niini, mahimo silang makatabang sa pagbantay sa palibot sa eskwelahan ug sa pagsaway o pag-intervene kung gikinahanglan. Kabahin kini sa giplanong kasabutan tali sa DILG ug Department of Education o DepEd aron mas mapahugot ang seguridad sulod ug palibot sa mga school premises.
Gipasiugda ang maong lakang human sa nahitabong insidente sa pagpamusil sa usa ka eskwelahan sa Zamboanga City, nga nagpataas sa kabalaka bahin sa kaluwasan sa mga estudyante ug school personnel. Matud ni Remulla, limitado kasagaran sa gawas ug palibot sa mga eskwelahan ang presensya sa kapulisan. Busa, gusto sa DILG nga adunay dugang nga personnel nga makatabang sa pagmonitor sa sulod mismo sa campus.
Apil usab sa mga lakang nga gitutokan ang paglikay sa bullying ug uban pang hulga sa kaluwasan ug kaayohan sa mga estudyante.
Photo courtesy: DILG
