Mahimong makadawat ug death aid benefit nga P10,000 ang mga pamilya sa mga mag-uuma nga mamatay samtang aktibo pa ang ilang insurance sa humayan ubos sa Philippine Crop Insurance Corporation (PCIC) Region 9.
Matud ni Edilberto Dondoyano, Division Chief III sa Claims and Adjustment Division, kabahin ang death aid benefit sa rice and corn insurance nga nagsilbing built in benefits aron makatabang sa pamilya sa panahon sa pagkakalas sa kinabuhi samtang insured pa ang mga pananom.
Segun ni Dondoyano, wala lamang sila nakatutok sa kadaot sa pananom, apan apil usab ilang gihatagan ug pagtagad ang proteksyon alang sa mga kwalipikadong insured nga mag-uuma.
Gipasabot niya, nga importante nga masabtan sa mga mag-uuma ang ilang mga benepisyo ug kondisyon sa insurance aron masiguro nga ang ilang pamilya makadawat sa angay nga tabang kung adunay dili maayong panghitabo.
Samtang, gidasig ni Dondoyano ang mga mag-uuma nga magpadayon sa pagpa-insure sa ilang mga pananom ug muduol sa PCIC office alang sa kompleto nga impormasyon bahin sa coverage, requirements ug death aid benefit.
