Gihingusgan sa 1st Davao Oriental Provincial Mobile Force Company (1st DOPMFC) ang ilang mga programa nga nagtumong sa pagpalig-on sa relasyon tali sa kapulisan ug sa komunidad, ilabina sa paghatag og impormasyon ug serbisyo ngadto sa mga residente nga anaa sa hilit nga mga lugar.
Atol sa pagbisita ni PLT Michael Bryan N. Pretal, 3rd Platoon Leader sa 1st DOPMFC, sa Juander Radyo Mati, iyang gipaambit ang nagkalain-laing programa ug kalihokan nga ilang gipatuman, diin lakip na niini ang pagbisita sa mga tulunghaan aron maghatag og mga lecture kabahin sa pagpugong sa ilegal nga droga ug pagpalig-on sa kahibalo sa mga estudyante batok sa bullying.
Gipasabot usab ni Pretal nga kanunayng nagabisita ang mga kapulisan sa RPSB sa mga GIDAS o Geographically Isolated and Disadvantaged Areas aron makahatag og pagkaon ug uban pang tabang ngadto sa mga lumad ug mga komunidad. Dugang pa, gipakusgan usab sa kapulisan ang pakigtambayayong sa mga media partners ug naghatag og kahigayonan sa mga estudyante nga nanginahanglan og scholarship pinaagi sa mga programa nga makatabang sa ilang edukasyon.
Pinaagi sa maong mga inisyatibo, mas napaduol sa kapulisan ang ilang serbisyo ngadto sa katawhan ug mas napalig-on ang pagsalig, kooperasyon, ug maayong relasyon tali sa kapulisan ug sa komunidad.
