Boluntaryong misurender ang duha ka miyembro sa Communist Terrorist Group (CTG) ug dala ang mga armas ngadto sa Kapulisan sa Talakag, Bukidnon niadtong Agosto 16, 2026.
Giila ang mga misurender nga sila alias “Tagyao,” 35 anyos, nga nagdala ug usa ka caliber .38 revolver nga may duha ka buhing bala, ug alias “Morsid,” 33 anyos, nga nag-surender usab ug usa ka improvised shotgun nga may duha ka 12-gauge nga bala, parehong lumulupyo sa Barangay Lantud ug giila nga sakop sa Militia ng Bayan (MB) ubos sa Platoon Fury, Sub-Regional Committee (SRC)-5 sa North Central Mindanao Regional Command (NCMRC).
Gipahigayon ang maong operasyon sa Police Regional Office 10 pinaagi sa 1004th Maneuver Company sa Regional Mobile Force Battalion 10, ubos sa command ni PNP Chief PGEN Jose Melencio C. Nartatez Jr.
Base sa impormasyon, ang duha ka kanhi rebelde nagsilbi nga nag-unang naghatag ug logistical support sama sa pagkaon ug mga batakang kinahanglanon sa mga armadong sakop sa ilang lugar sa wala pa sila nakahukom nga mobiya sa maong grupo human nadasig sa panig-ingnan sa ilang mga silingan ug kanhi kauban nga una nang mibalik sa gobyerno ug nakadawat ug tabang gikan sa mga programa sa kapulisang ug lokal nga kagamhanan.
Sa pagkakaron, ang duha ka kanhi myembro kauban ang ilang gipagawas nga mga armas ug bala naa sa kostudiya sa 1004th MC alang sa custodial debriefing, profiling, ug hustong dokumentasyon aron makasugod sila sa bag-ong kinabuhi nga malinawon kauban ang ilang pamilya
Photo Courtesy:PNP –PIO 10
