Gipahimangnoanb sa Davao Light and Power Company (DLCP) ang mga konsumante sa Davao del Norte nga mahimong makatabang sa pagtipid sa kuryente ang pag-unplug sa water dispenser panahon sa gabii, ilabina kung dili kini kanunay gamiton.
Sumala sa energy conservation tip sa nasangpit nga kompanya, mas maayong tangtangon sa saksakan ang water dispenser sa oras nga wala kini gigamit aron malikayan ang padayon nga konsumo sa elektrisidad.
Dili lamang kini makatabang sa pagpaubos sa konsumo sa kuryente, apan usa usab kini ka lakang sa paglikay sa posibleng electrical-related incidents, lakip na ang sunog, ilabina kung adunay problema sa wiring, outlet o mismong appliances.
Giawhag usab ang mga panimalay nga susihon kanunay ang kondisyon sa ilang mga electrical outlets, ug likayan ang pagbilin sa mga butang nga nakasaksak kung dili na kinahanglan gamiton.
Pinaagi sa simple nga mga pamaagi sama sa pag-unplug sa mga appliances nga wala na gigamit, makatabang ang matag panimalay sa mas episyenteng paggamit sa elektrisidad ug pagpalambo sa electrical safety sulod sa ilang mga balay.
Photo Courtesy: DLPC
