Ugdaw ang upat ka balay nga nasunog sa Block 32, Lot 11, Phase 2 sa FE Village, Barangay Mankilam, Tagum City. Dali sab mitubag ang mga bombero sa Bureau of Fire Protection (BFP) Tagum aron mapalong ang kalayo. Sa pagpanguna sa responder nga si FO2 Don Felder P. Santa Cruz, Chief In-Charge – Line man.
Sumala pa ni FO2 Santa Cruz atol sa pakighinabi sa Juander Radyo Tagum News Team nga wala pay opisyal nga report kalabutan sa maong sunog, apan iyang gipahimangnoan ang katawhan nga likayan nga mobiya sa panimalay nga wala na-off ang plangka, ug likayan sab nga mabyaan ang niluto.
Gawas sa mga balay, nasunog usab ang usa ka motorsiklo ug pipila ka appliances, aduna sab naluwas nga bata nga may autism. Gikataho nga grabeng kadaot ang naangkon sa mga apektadong residente tungod sa sunog, ug wala nay mga gamit nga naluwas gikan sa maong insidente, gipanawagan sab nila ang hinanaling tabang sa lokal nga panggamahanan sa Tagum.
Padayon pa ang imbestigasyon sa BFP Tagum, aron mahibal-an ang hinungdan sa sunog ug ang kantidad sa mga kadaot.
