Posibleng mosaka ang presyo sa pipila ka klase sa gulay ug isda tungod sa kadaot nga nahatag sa Habagat ug sa mga niaging bagyong Luis ug Maymay sa mga uma ug palaisdaan. Base sa datos sa Department of Agriculture (DA), miabot na sa P1.4 bilyon ang kantidad sa kadaot sa sektor sa agrikultura tungod sa mga kalamidad. Tungod sa kusog nga ulan ug pagbaha, naapektuhan ang suplay sa mga produkto gikan sa Cordillera, Central Luzon ug Southern Tagalog.
Lakip sa misaka ang presyo sa cauliflower nga anaa na sa P180 hangtod P350 kada kilo, gikan sa P120 hangtod P270. Ang pechay Baguio anaa sa P40 hangtod P150, samtang ang carrots miabot na sa P170 kada kilo. Misaka usab ang presyo sa repolyo, ampalaya, talong ug sitaw. Sa mga isda, miabot na sa P400 kada kilo ang galunggong, samtang ang bangus anaa sa P160 hangtod P320 ug ang tilapia anaa sa P200 kada kilo.
Sa Benguet, pipila ka mga mag-uuma napugos sa paglabay sa ilang mga ani nga carrots ug repolyo human kini madunot samtang naghulat nga madala ug mabaligya sa La Trinidad. Matod sa DA, anaa na ang tabang alang sa mga apektadong mag-uuma, lakip ang recovery loan package aron matabangan sila sa pagbangon ug pagpadayon sa ilang panginabuhian human sa kadaot nga nahatag sa mga kalamidad.
Photo Courtesy: Travel Info
