Nakaangkon ug samad bun-og sa lawas ang usa ka 46-anyos nga ginang human nabanggaan ug motorsiklo samtang mitabok sa pedestrian lane didto atbang sa Davao Oriental Provincial Medical Center sa Barangay Don Martin Marundan, Mati City, pasado ala 1:10 sa hapon niadtong Agosto 18, 2026.
Ang biktima naila nga si Ruth M. Dele Torre, minyo ug residente sa Tagabebe, Governor Generoso. Samtang giila usab ang driver sa Honda Click nga motorsiklo nga usa ka 17-anyos nga estudyante nga adunay kauban nga backrider.
Base sa inisyal nga imbestigasyon, ang motorsiklo nagbyahe gikan sa Martinez-Dahican padulong sa Mati Doctor’s Academy, apan pag abot sa lugar sa insidente, wala mabantayi sa driver ang babaye nga milabang sa pedestrian lane nga miresulta sa disgrasya.
Tungod sa impact, naangol ang biktimang babaye lakip na usab ang driver ug ang backrider niini. Dali usab sila gidala sa DOPMC alang sa medikal nga pag-atiman.
Sa pagkakaron nagpadayon ang imbestigasyon sa mga kapulisan kabahin sa maong insidente.
Photo Courtesy: Ambot lang nimo dong
