Gipahigayon sa Pamahalaang Panlalawigan sa Bukidnon, pinaagi sa Provincial Planning and Development Office (PPDO) ug sa pakigtambayayong sa DILG, ang pag-update sa mga Programa, Proyekto, ug Aktibidad (PPAs) alang sa Peace and Order and Public Safety (POPS) Plan sa FY 2027 niadtong Agosto 18, 2026, sa Kaamulan Open Theater, Malaybalay City.
Tumong sa maong aktibidad nga repasuhon ug mas palig-unon ang mga kasamtangang lakang aron matubag ang mga nag-unang hisgutanan sa pangkalinaw ug seguridad sa tibuok lalawigan.
Gisuportahan ni Gobernador Rogelio Neil P. Roque ang maong tigum diin iyang gipadayag ang kamahinungdanon sa pagtinabangay sa matag ahensya aron makatukod og mga praktikal nga solusyon alang sa seguridad sa kadaghanan.
Samtang, gipresentar usab ni DILG Bukidnon Provincial Director Rhona Pedraza-Abadilla ang mga nakalabay nga hagit ug obserbasyon sa unang tuig sa pagpatuman sa plano aron magsilbing giya sa pagpalambo sa mga bag-ong pamalaod.
Pinaagi sa usa ka workshop nga gipangulohan sa PPDO ug DILG, nabahin sa nagkalain-laing sektor ang mga kaabag nga ahensya aron matuki ug ma-align ang ilang mga PPA sa sakto nga pondo ug estratehiya diin gilauman nga makamugna ang lalawigan sa mas maayo ug epektibong plano alang sa mas luwas ug lig-ong komunidad sa Bukidnon sa tuig 2027
Photo Courtesy: DILG Bukidnon
