Pagatukoran og Automated Weather Stations (AWS) ang siyam ka local government units sa lalawigan sa Bukidnon pinaagi sa kinatibuk-ang pondo nga nagkantidad og ₱9.297 milyon.
Ang maong pondo, nga gikan sa pakig-alayon sa Provincial Government of Bukidnon, Department of Science and Technology (DOST), ug sa siyam ka LGU, opisyal nga gipahigayon pinaagi sa usa ka Ceremonial Fund Turnover niadtong Agosto 17, 2026.
Nagtumong ang proyekto sa paghatag og real-time ug tukmang impormasyon bahin sa dagan sa panahon ug klima aron matabangan ang mga mag-uuma ug lokal nga panggamhanan sa pagpangandam batok sa posibles nga kadaot sa mga pananom. Gipasiugda ni Provincial Governor Rogelio Neil P. Roque nga dako ang matabang sa maong sistema aron mapamenos ang pagkalugi sa agrikultura taliwala sa hulga sa pagbag-o sa dagan sa panahon.
Ibutang ang mga pasilidad sa mga lungsod sa Impasug-ong, Kitaotao, Kalilangan, Maramag, Talakag, Quezon, Kadingilan, Lantapan, ug sa dakbayan sa Malaybalay, diin ang matag estasyon adunay sakop nga hangtod 20 kilometro nga makaabot usab sa kasikbit nga mga dapit.
Ang maong inisyatibo kabahin sa Project SARAI-CENTRO Northern Mindanao ug sa Community-Level SARAI-Enhanced Agricultural Monitoring System (CL-SEAMS) alang sa mas paspas ug epektibong crop monitoring ug damage assessment
Photo Courtesy:DOST/LGU – Bukidnon
