Gipadayag ni Department of Education (DepEd) Secretary Sonny Angara nga mas importante ang pagbaton og kusog nga relasyon ug pakig-alayon sulod sa school community kay sa mga pisikal lamang nga sukdanan sa seguridad sama sa CCTV, koral, ug metal detector.
Pag-atubang sa mga tigbalita atol sa iyang pagbisita sa Zamboanga City human sa nahitabong pagpamusil sulod sa Ateneo de Zamboanga University, gipadayag sa kalihim nga kinahanglang usab nga makighugoy-hugoy ug mailhan og maayo ang mga estudyante tungod kay ang tunghaan mao man ang ikaduhang pinuy-anan sa kabataan.
Gidugang usab ni Angara nga nagpadayon ang pakig-alayon sa kagamhanan ug sa mga tunghaan ngadto sa mga ginikanan aron maghatag og kinahanglang suporta, bisan kon kini nakabase pa lamang sa voluntary basis sa pagkakaron. Giangkon usab sa kalihim ang dakong hagit sa pag-abot sa tanang estudyante, ilabina kadtong adunay gihambin nga mga suliran sama sa mga gikan sa broken families o nanginahanglan og husto nga paggiya ug counseling.
Tungod sa nagpadayon nga kakulangon sa mga guidance counselors sa nasud, nanawagan ang kalihim og usa ka “bayanihan approach” diin ang tanang sektor—gikan sa mga magtutudlo, ginikanan, hangtod sa lokal nga komunidad—magtinabangay aron masiguro ang kaayuhan, kaluwasan, ug mental nga panglawas sa mga kabataan sulod ug gawas sa tunghaan
Photo Courtesy:DepEd / Senate PRIB
