Giisip ni NLEX Road Warriors head coach Jimy Alapag, nga usa ka dakong panalangin ang higayon nga nakatrabaho niya ang NBA superstar nga si Russell Westbrook atol sa katapusang season niini sa National Basketball Association.
Si Alapag kaniadto usa ka assistant coach sa Sacramento Kings diin niya nakatrabaho si Westbrook sa iyang katapusang season sa NBA, sa wala pa kini mipahibalo sa iyang pagretiro.
Matud ni Alapag, mas nahimo niyang bililhon ang ilang panagtinabangay human nahibaloan nga mao na diay kadto ang katapusang season ni Westbrook isip player.
Si Westbrook, nga napili isip fourth overall pick sa 2008 NBA Draft, usa sa mga bantugang point guard sa kasaysayan sa liga. Nakadaog siya sa NBA MVP award niadtong 2017 ug siyam ka higayon nga napili isip NBA All-Star.
Nailhan usab siya sa iyang all-around game, ilabi na sa pagkab-ot og triple-double average sulod sa usa ka tibuok season upat ka higayon. Para kang Alapag, angay ibutang si Westbrook sa Top 10 greatest guards sa kasaysayan sa NBA, tungod sa iyang athleticism ug abilidad isip point guard.
Gipahayag usab ni Alapag nga bisan kusgan si Westbrook isip basketball player, mas iyang gidayeg ang personalidad niini gawas sa court, ilabi na ang iyang pagtabang sa komunidad.
Matud pa ni Alapag, usa ka dakong dungog alang kaniya ang makahimo og basketball conversations ug makakat-on gikan sa usa sa mga pinakadakong ngalan sa NBA.
Sa pagretiro ni Westbrook, gipaabot ni Alapag ang iyang maayong pangandoy alang sa kanhi MVP ug Hall of Fame-caliber nga magdudula, nga iyang giila dili lamang isip usa ka dakong atleta kundili usa usab ka maayong tawo.
Photo Courtesy: ESPN.com
