Nagtinguha ang administrasyong Marcos nga makatigom og P101.5 bilyon gikan sa privatization o pagbaligya sa pipila ka dagkong government-owned assets sa sunod tuig, ilabi na ang mga hydropower plant.
Sumala sa Department of Finance, lakip sa dagkong asset nga target ang Caliraya-Botocan-Kalayaan o CBK Hydroelectric Power Complex sa Laguna ug Quezon, ingon man ang Agus-Pulangi hydropower assets sa Mindanao.
Ang CBK Hydroelectric Power Complex nga adunay kapasidad nga 797 megawatts gilauman nga makahatag og kapin P36 bilyon nga kita sa gobyerno. Bisan nahuman na ang transaksyon, gilauman nga mosulod ang kita sa 2027 tungod sa accounting considerations.
Samtang, ang Agus-Pulangi complex sa Mindanao, nga gilangkuban sa pito ka hydropower plants ug adunay total installed capacity nga labing menos 1,000 megawatts, giplanong ipa-rehabilitate ubos sa Public-Private Partnership o PPP framework.
Gilauman nga mapili ang pribadong partner sa sunod tuig ug magsugod ang rehabilitation sa 2027, diin ang pagkakompleto sa proyekto giplanong ipatuman matag hugna gikan 2028 hangtod 2032.
Samtang alang niining 2026, gipaubos sa gobyerno ang privatization revenue target ngadto sa P38.1 bilyon, gikan sa una nga target nga P101 bilyon. Apil sa mga asset nga giplanong ibaligya karong tuiga ang Food Terminal Inc. o FTI ug Mile Long properties, human makompleto ang pagbaligya sa Atrium of Makati.
Matud sa Department of Finance, ang maong mga transaksyon kabahin sa paningkamot sa gobyerno nga makatigom og dugang kita pinaagi sa pagdumala ug privatization sa mga government assets.
Photo Courtesy: Philippine News Agency
