Usa ka talagsaong butang ang nakaplagan sa pamilya sa usa ka 90-anyos nga babaye nga namatay niadtong Septiyembre 2, 2024 sa Virginia, Estados Unidos. Sa paglimpyo sa iyang balay, nakit-an sa iyang anak nga si Linda Wiseman sulod sa freezer ang usa ka biscuit nga adunay edad nga 84 ka tuig.
Aduna usab kini’y handwritten note nga nag-ingon nga ang biscuit gihimo niadtong Agosto 1940 ni Mrs. Dara L. Chambers sa Blankenship home. Natingala ang pamilya kung nganong gitipigan kini sa ilang lola sulod sa daghang dekada. Base sa ilang pagsusi, si Dara Chambers mao ang unang asawa ni Harold, nga igsoon sa ilang lola.
Namatay si Dara niadtong 1940, mao nga gituohan sa pamilya nga posibleng usa kadto sa iyang kataposang gihimong biscuit. Sumala sa apo nga si Andy Wiseman, dili hilig ang iyang lola sa pagtipig og mga butang nga dili na kinahanglan, busa ilang gituohan nga adunay sentimental value ang maong biscuit.
Gituohan nga tingali gitipigan kini sa iyang lolo human sa pagkamatay sa iyang unang asawa, ug sa ulahi gibutang sa iyang lola sa freezer aron dili kini ilabay. Bisan pa og gahi na kaayo ug sama na sa bato, wala kini gilabay sa pamilya. Hinuon, plano sa iyang inahan nga ipadayon ang pagtipig niini isip usa ka talagsaong handumanan sa ilang lola ug sa kasaysayan sa ilang pamilya.
Alang sa pamilya, ang 84-anyos nga biscuit dili na lamang usa ka karaang pagkaon, kundili nahimo nang simbolo sa ilang mga handumanan, gugma ug kasaysayan sa pamilya.
Photo Courtesy: PEP.ph
