Nagpadayon sa Lokal nga Panggamhanan sa New Bataan Davao De Oro ang paghatag og pinansyal nga suporta sa mga solo parent pinaagi sa cash assistance nga gipanghatag niadtong Agosto 18, 2026 sa Municipal Gymnasium. Nikabat sa 457 ka validated solo parents gikan sa nagkalain-laing barangay ang nakadawat og tig-₱3,600, nga mikabat sa kinatibuk-ang ₱1,645,200 nga pondo.
Ang maong assistance gitumong isip dugang suporta sa mga solo parent sa pag-atubang sa ilang adlaw-adlaw nga panginahanglan ug mga responsibilidad isip ginikanan nga nag-inusara sa pag-atiman sa ilang mga anak.
Gipasiugda sa lokal nga panggobyerno nga ang paghatag og cash assistance kabahin sa padayong mga serbisyo alang sa mga sektor nga nanginahanglan og dugang nga suporta. Kauban ni Mayor Bianca Cualling Brua sa maong kalihukan sila Vice Mayor Elfa Digaynon ug Konsehal Evi Mangubat.
Pinaagi sa maong programa, padayon nga gihatagan og pagtagad ang kaayohan sa mga solo parent ug ilang mga anak, samtang gipaningkamotan sa lokal nga panggobyerno nga mapalapad pa ang mga serbisyo nga direktang makatabang sa mga pamilyang New Bataanon.
