Gihatagan og dakong pagtagad sa Sangguniang Panlungsod sa Valencia ang nagpadayong kalainan sa presyo sa live hogs sa farmgate level ug sa mas taas nga presyo sa pork products sa merkado atol sa ilang 51st Regular Session kagahapon Agosto 17, 2026.
Gidapit sa konseho ang mga opisyal gikan sa CEED, City Veterinary Office, ug DTI Bukidnon aron pagtuki sa mga hinungdan sa maong price discrepancy ug pagpangita og solusyon alang sa seguridad sa mga mag-uuma ug konsumidor.
Aron mapanalipdan ang lokal nga industriya, girekomendar ni Konsehal Mark Anthonee T. Bernal ang usa ka Managed Import Policy nga nagtumong sa pagdumala sa importasyon sa karne sa baboy basi sa aktuwal nga panginahanglan sa suplay ug aron malikayan ang pag-apektar sa lokal nga produksyon.
Gisundan usab kini sa resolusyon ni Konsehal Karen M. Gamolo nga nagsugyot sa pagbutang og weekly monitoring mechanism sa farmgate, wholesale, ug retail prices pinaagi sa Valencia City Price Coordinating Council aron makakuha og kasaligang datos sa merkado.
Kini nga mga lakang kabahin sa paningkamot sa lokal nga pangagamhanan sa Valencia sa tinguha nga makatukod og mga polisiyang nakabase sa sakto nga datos aron mapanalipdan ang interes sa mga lokal nga hog raisers ug mapalambo ang ekonomiya sa dakbayan
Photo Courtesy:Valencia City LGU
