Gitudlo isip bag-ong City Fire Marshal sa Malaybalay City Fire Station si Chief Inspector Lloyd M. Villaroya diin iyang gipahayag ang mga preparasyon sa BFP batok sa bahad sa huwaw ug posibleng pagpanghitabo sa mga sunog taliwala sa bahad sa El Niño.
Sa iyang pag-atubang sa Sangguniang Panlungsod kagahapon Agosto 18, 2026 sa ika -57 regular session, gipasiugda ang pagpatuman sa “Oplan Ligtas Pamayanan,” pag-inspeksyon sa mga pasilidad, ug ang pagpangandam sa ilang mga ekipo ug tinubdan sa tubig sa pakigtambayayong sa LGU ug Prime Water.
Aron maatubang ang kakulang sa tubig kon mag-sunog panahon sa El Niño, nag-andam ang BFP og mga reservoir tanks nga makakarga og hangtod 6,000 ka litrong tubig sa ilang stasyon ug nagplano usab nga magbutang og mga water impounding projects sa mga estratehikong lugar. Gawas niini, gipausbaw usab ang pakig-alayon sa CENRO ug mga forest rangers aron paspasan ang pag-monitor ug pag-atubang sa mga malagmit nga forest fires sa kabukiran
Samtang, gipahalipayan ni Councilor Alan Legaspi ang tibuok pwersa sa Malaybalay City Fire Station sa pagkahimo nitong “Best Fire Station” sa tibuok Region 10 sa ika-limang sunod-sunod nga tuig.
Gipaila usab ni Villaroya ang iyang mga kaubang division heads nga maoy mogiya sa nagkalain-laing operasyon, inspeksyon, ug imbestigasyon alang sa pagpreserba sa kaluwasan sa tibuok dakbayan sa Malaybalay.
Photo Courtesy: SP – Malaybalay City
