Naggahin ang Small Business Corporation (SBCorp) og P1 bilyon alang sa Youth Enterprise Fund, nga naghatag og pautang sa mga batan-ong negosyante.
Matod ni Wally Don Calderon, hepe sa SBCorp Innovation and Advocacy Group, ang programa nagtanyag og mga pautang nga gikan P30,000 hangtod P500,000 aron matabangan ang mga batan-ong negosyante nga makasugod o makapalambo sa ilang negosyo. Ang mga batan-on nga nag-edad og 18 hangtod 30 anyos ang kwalipikado nga maka-access sa pondo.
Ang mga pautang adunay maximum nga termino nga tulo ka tuig o 36 ka bulan, nga adunay interes nga 1 porsyento kada bulan base sa minimum nga nahibiling balanse. Naghatag usab ang programa og mentoring, capacity building, access sa merkado, ug tabang alang sa mga negosyanteng gustong mag-export sa ilang mga produkto.
Aduna usab ang SBCorp og e-transport loan nga nagtumong sa pagtabang sa mga operator ug drayber sa public utility vehicles nga mobalhin ngadto sa electric vehicles. Matod ni Calderon, ang mga gustong mag-transition ngadto sa electric vehicles mahimong makapangutang pinaagi sa SBCorp. Anaa kini alang sa mga operator sa modernized jeepneys ug uban pang public transport operators.
Photo Courtesy: PNA
