Nahaw-as sa kapobrehon ang gibanabanang 8.8 milyong Pilipino niadtong 2025 human mikunhod ngadto sa 9.7 porsyento ang poverty incidence sa nasud, gikan sa 18.1 porsyento niadtong 2021. Sumala sa Department of Economy, Planning, and Development DEPDev, nakaamot sa maong pag-uswag ang pagbangon sa kita ug trabaho, lakip ang padayon nga mga programa sa social protection sa gobyerno.
Base usab sa pinakabag-ong survey sa Social Weather Stations (SWS), mikunhod ngadto sa 49 porsyento ang mga Pilipinong nag-ingon nga kabus ang ilang pamilya niadtong Hunyo, gikan sa 52 porsyento niadtong Marso. Mikunhod usab gikan sa 14.5 milyon ngadto sa 13.6 milyon ang gibanabanang gidaghanon sa mga pamilyang nag-rate sa ilang kaugalingon isip kabus.
Apan nagpasidaan ang DEPDev nga mahimong maapektuhan ang maong kalamboan kung magpadayon ang taas nga inflation, ilabina sa mga kabus ug low-income nga panimalay. Niadtong Hulyo 2026, mikunhod ngadto sa 6.2 porsiyento ang inflation gikan sa 6.4 porsiyento niadtong Hunyo, apan nagpabilin kini nga labaw sa target range sa gobyerno nga duha hangtod upat ka porsiyento.
Giduso usab sa DEPDev ang pagpalig-on sa pamuhunan, exports, agrikultura ug industriya aron mapadayon ang pagtubo sa ekonomiya ug pagpakunhod sa kapobrehon.
Photo Courtesy: wikipedia
