Gisusi na sa Malacañang kon asa sa 13,917 ka flood control projects gikan sa miaging administrasyon ang wala epektibong nakapugong sa pagbaha.
Mismo si Palace Press Officer USec. Claire Castro ang mipagawas sa maong pamahayag human sa lapad nga pagbaha sa Metro Manila, diin gipahayag niya nga gihulat pa sa Palasyo ang kumpletong datos gikan sa Department of Public Works and Highways (DPWH) aron mailhan ang mga proyektong wala naglihok, substandard, o kaha mga ghost projects.
Usa sa mga gihatag nga ehemplo sa opisyal mao ang Sunog Apog pumping station nga kaniadto dili maayo ang pagkahimo apan nagamit ra gihapon human gipaayo.
Gipasalig sa Malacañang nga padayon ang mga paningkamot sa DPWH sa pag-ayo sa mga drainage system ug agianan sa tubig aron matubag ang mga kakulangon sa imprastraktura sa nasod.
Bisan pa man niini, gipasiugda ni Castro nga kinahanglan ang pagtinabangay sa gobyerno ug sa publiko. Iyang gipahimangnoan ang tanan nga mahimong walay kapuslanan ang bisan unsang kadako sa proyekto batok sa baha kon padayon gihapon ang pataka nga paglabay sa basura sa mga estero ug mga agianan sa tubig
Photo Courtesy:PCO
